Абай облысында «Асыл бесік — Ақсуат» атты спорт және өнер фестивалі жалауын желбіретті. Ырғызбай әулие рухына ас беруден бастау алған игілікті іс-шара Ақсуат ауылындағы орталық стадионда «Асыл арлан» турнирімен жалғасты. Оған еліміздің барлық облыстарынан 32 балуан келіп, бозкілемде бақ сынасты.
Фестивалді Абай облысы әкімінің орынбасары Әділбек Мұсабаев құттықтау сөзімен ашты. Ақсуат мәдениет үйінің әртістері театрландырылған қойылым көрсетіп, көрерменді сусындатты. Алыс-жақыннан келген құрметті қонақтар сапында: Қазақстанның Халық артисі Тұңғышбай Жаманқұлов, композитор, ҚР Халық артисі Алтынбек Қоразбаев, ақын, Қазақстанның еңбек сіңірген қайраткері, Түріксой жазушылар одағының төрағасы Ұлықбек Есдәулет, айтыс өнерінің жанашыры, ҚР еңбек сіңірген қайраткері, ақын Жүрсін Ерман, ҚР Парламенті сенатының депутаты Қайрат Тастекеев, Qazaq Kuresi Ассоциациясының бас директоры Дамир Бекбосынов, облыстық дене шынықтыру және спорт басқармасының басшысы Ержан Әбілқасымов, облыстық мәслихат депутаты Қайырлы Қасенов, Тарбағатай ауданы әкімінің атынан Бақытжан Қажыкенов болды. Қонақтар ақжарма лебіздерін білдірді.

 

Посмотреть эту публикацию в Instagram

 

Публикация от ASSYLTAS қоғамдық қоры (@assyltas_qory)

TAS GROUP компаниясының басшысы, «Асыл бесік- Ақсуат» спорт және өнер фестивалінің идея авторы, меценат Дулат Тұрсынұлы Тастекеев осы ауқымды іс-шараны ұйымдастыру шарасының басы-қасында жүрген аудан әкімінің міндетін атқарушы Ерсін Кәдірбекұлы бастаған мемлекеттік мекеме ұжымдарына, жан-жақты қолдау жасап жатқан өңіріміздің атымтай-жомарт азаматтарына, жалпы аудан тұрғындарына өз алғысын айта келіп, фестивалдің сәнді де, мәнді өтуіне тілектестігін білдірді.
Еске салсақ, «Асыл бесік-Ақсуат» спорт және өнер фестивалі аясында 19-21 шілдеде қазақ күресінен «Асыл арлан» турнирі, «Асылтас» театрының «Тарихқа тағзым» қойылымы, Екпін атшабарында 25 шақырымдық аламан, 15 шақырымдық топ бәйге, 135 шақырымдық ұлы аламан, белгілі эстрада жұлдыздарының қатысуымен Гала-концерт ел назарына ұсынылмақ. Қазақ күресі, айтыс, бәйге жарыстарының жеңімпаздарына жиыны 7 су жаңа автокөлік тігілген.